Larsap-in State Information Commissioner atan Dr. Lalzirmawia Chhangte rinawmna thu tiam tirin a lalut

Hnahthial Post | March 3, 2026, Aizawl: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Dr. Lalzirmawia Chhangte, IAS (Rtd.) chu Durbar Hall, Lok Bhavan-ah rinawmna thu tiam tirin Mizoram State Information Commission (MSIC) hnuaia State Information Commissioner atan a lalut.

Lakluhna inkhawmah hian Chief Secretary Pu Khilli Ram Meena chuan Larsap-in State Information Commissioner atana Dr. Lalzirmawia Chhangte, IAS (Rtd.) a ruatna notification a chhiar chhuak hmasa a. Hemi hnu hian Larsap General (Dr) Vijay Kumar Singh chuan Dr. Lalzirmawia Chhangte, IAS (Rtd.) chu rinawmna thutiam chham tirin Mizoram State Information Commissioner atan a lalut a ni.

He hunah hian Chief Minister Pu Lalduhoma, Speaker Pu Lalbiakzama, EF&CC Minister Pu Lalthansanga, Agriculture Minister Pu PC Vanlalruata, IPRP&S Minister Pu B. Lalchhanzova leh mi pawimawh dangte an tel a ni.

Mizoram State Information Commissioner atana lakluh tak Dr. Lalzirmawia Chhangte, IAS (Rtd.) hi Tarpho, Hnathial District khaw chhuak niin, thiamna lamah B.A. (Hons. in Education) (NEHU 1986), LL.B (NEHU, 1993), M.A. (Public Administration) (HPU Shimla 2001), B.C.S (Serampore College, 2007), D.Min (Serampore College, 2018) leh Ph.D (Public Administration) (MZU, 2023) degree nei a ni.

May ni 30, 1991 khan Mizoram Civil Service zawmin, December ni 3, 2019 khan Indian Administrative Service (IAS) ah hlankai niin, AGMUT Cadre 2009 allotted a ni a. Serchhip District Bawrhsap dinhmun a chelh hnuah Mizoram Sawrkar hnuaia Department hrang hrangah Secretary dinhmun a chelh a. Commissioner-a a kaisan hnuah Excise & Narcotics Department-ah awmin hemi hnu hian Commerce & Industries Department-a Commissioner hna a chelh laiin August ni 31, 2025 khan superannuation pension-in a chhuak a ni. A service hun chhung hian DoPT Sponsored Foreign Training pawimawh tak takahte a kal tawh bawk a ni. A nupui fanaute nen PWD Tlang, Ramhlun Venglai, Aizawlah an cheng mek a ni.