Aizawl Municipality Corporator thlan thar 19 te lak luh an ni; Mayor leh Deputy Mayor thlang nghal

Hnahthial Post | May 7, 2026, Aizawl: Vawiin khan Board of Corporators (BOC) Meeting Hall, AMC Office, Ṭhuampuia-ah AMC, 2026 inthlanpuia Corporator thlan thar 19 te lakluhna inkhawm buatsaih a ni a. Mayor leh Deputy Mayor thlan nghal a ni.

Corporator thar te lakluhna inkhawm hi Municipal Commissioner Pu Joseph H. Lalramsanga’n kaihruaiin, Corporator thar te hming a chhiarchhuah zawhah, Aizawl District Magistrate, Er. Lalhriatpuia’n Aizawl Municipality Corporator thar 19-te chu India Dânpui laka rinawmna thutiam (oath of allegiance to the Constitution of India) laktirin a la lut.

Corporator te lakluh an nih hnuah hian The Mizoram Municipalities (Procedures & Conduct of Business ) Rules 2007, Sec 4 in a phut angin, Mayor leh Deputy Mayor thlan nghal a ni a. Candidate dang an awm loh avangin Rules Sec 4 (5) tlawhchhanin Mayor atan Ward VI Corporator Pu H. Lalremtluanga leh Ward XVI Corporator Pi R. Lalawmpuii te chu Deputy Mayor atan tlinga puan an ni a. Mayor leh Deputy Mayor te hian thutiam (oath of Secrecy) an la nghal bawk.

Mayor thlan thar Pu H. Lalremtluanga chuan Executive Corporator tur mi 4: Pi Christina Roluahpuii Sailo (Ward VIII), Pu Vanlalhruaia (Ward XIII), Pu Vanlalfaka (Ward III) leh Pu K. Lalrodinga (Ward XVIII) te a ruat a, Executive Corporator te pawh hian Oath of Secrecy an la ve nghal a ni.

Vawiin AMC Corporator te lakluh inkhawm hi Chief Minister Pu Lalduhoma, Assembly Speaker Pu Lalbiakzama, Minister: Pu K.Sapdanga, Pu C.Lalsawivunga, Dr.Vanlalthlana, Pu B.Lalchhanzova, Prof.Lalnilawma, Pu Lalnghinglova Hmar te bakah Member of Parliament(RS) Pu K.Vanlalvena leh MLA: Pu Lalchhuanthanga, Pu Ginzalalate ten telpui a ni.