Hnahthial Post | May 7, 2026, Aizawl: Mizo Zirlai Pawl General Headquarters Executive Committee vawi 652-na vawiin May Ni 7, 2026(Ningani)-a thukhawm chuan, Mizoram sawrkar hnuaia hnathawk pension tawh rawih nawn (re-employment) tunhnaia awm chungchang chu ngun takin a ngaihtuah a, tunhma atangin MZP chuan pensioner rawih nawn hi nasa taka dodalin, duh lohna lantir a lo ni tawh thin a, tuna pensioner chungchangah pawh hian MZP ngaihdan ála ngai reng a ni.
MZP chuan sawrkar hnathawk ruai nawn lo tura thuneitute kan ngen reng lai a MZP ngenna ngai pawimawh lo a, sawrkarin a ruai nawn hi Mizoram mipuite leh thalai hna zawng mekte zah lohna leh hmusitnaah a ngai a. Pensioner rawih nawnna order chu May Ni 14, 2026(Ningani) ral hma ngeia sut turin Mizoram sawrkar thuneitute kan ngen a ni.
MZP chuan Sawrkar hnathawk pension rawih nawn awm fo thin chu tunhma atangin tha a tih loh thu a lo au chhuahpuiin, pension tawh rawih nawn(re-employment) an nih avanga bang tura nawr pawh a lo nei tawh thin a, chutiang thil thlen ngailo tur chuan thuneitute pawh a tul anga hma la turin kan ngen nawn a ni.
Sawrkar hnathawkte chu an hnathawh hun chhunga thahnemngai taka thawk turin kan ngen a, an pension hnuah erawh thalai hna zawng mekte kian turin MZP chuan a duh takzet a ni.
