Hnahthial Post | May 16, 2026, Champhai: MZP Headquarters Champhai chuan nimin khan Zirlai titha an chawimawi a, Pu Ramthanmawia, East Tuipui bialtu MLA chuan khuallian niin hun a hmanpui a, Pu Er. H. Vanlalmawia, SDO PHE chu khualzahawm a ni.
Khuallian Pu Ramthanmawia chuan thu sawiin chawimawi phute chawimawia an awm leh chu lawmawm a tih thu sawiin theihtawp chhuah sak thintu an chhungte leh an zirtirtute chungah lawmthu a sawi a. Zirlaite chu an hlawhtlin chhan chu Pathian a nih thu hre reng turin a chah a, Pathian an hriat a, an tih tlat chuan an tum emaw tum lo emaw hlawhtlinna a pe ngei ngei dawn tih a sawi a, ni phak ve lo tura an inngaihah pawh hlawhtlinna a pe thin, tih a sawi bawk.
Thalaite chu eirukna leh hlemhletna laka fihlim turin a chah a, an zirnaah a ni emaw, sawrkar hna an thawh hun a ni emawah pawh dikna tan tlat ni tur leh sum thianghlim lote chu hnawl zel ngam turin a chah a, kan ram hian eirukna leh hlemhletna a do a, a hnualsuat hunah Mizoram hi a dam dawn a ti a, chu chu Pathian thuawihna niin chu chuan chhungkaw hmuingilna a thlen thin a, sum neih kher a ni lova, chhungkua damna leh hriselna te a lo thleng thin, a ti.
 |
| Advertisement |
Zirlai chawimawi takte chu zirna sang zawk an kal leh zelna turah thahnem ngai thara, an zirnaah pawh rinawm tak leh taima taka lehkha zir zela, mi hlawhtling ni tur leh ram leh hnam tana mi rinawm leh innghahna tlak nia hlawhtling turin duhsakna a hlan a, Champhai atanga mi hlawhtling tam tak lo chhuak tawhte hnung zui ngei ngei tura an rilru ti paukhauh turin a fuih bawk. Zirlaite chu social media hman danah fimkhur turin a fuih a, tangkai taka hman theih a nih laiin a tha lo zawnga an hmang a nih chuan an tan thil pawi tak thlentu a ni dawn tih a sawi a, a tha zawnga an hman erawh chuan an zirna atan hmasawnna mai bakah Pathian an hriatna kawng atana hmanraw pawimawh tak a nih theih thu a sawi a, an nun fimkhur taka hmang a, sang tak thleng turin duhsakna a hlan a ni.
He hun hi Govt. Champhai College Multipurpose Hall-ah hman niin Jehova Hriatrenga, Vice President chuan a kaihruai a, Rev. Vanlalnghaka Jongte, BCM Bethel Pastor Bialtu chuan hunserh a hmang a, K. Lalruatfela, Secretary hnen atangin report ngaihthlak a ni bawk. Khualzahawm Pu Er. H. Vanlalmawia, SDO PHED bakah H. Lalruatdika, President te hnen atangin thusawi ngaihthlak a ni bawk. MZP General Headquarters atangin Vice-President Pu Sanghmingthanga, Pu Rothanliana, Treasurer bakah Secretary pahnihin an telpui a ni.
He hunah hian Chikim Group te'n Awareness an neih bakah GNM School te'n Special Item an nei bawk. H. Lalramchuana, Fin. Secretary kaihhruainain HSLC leh HSSLC zirlai tithate chawimawina hun hman a ni a, HSLC ah zirlai 97 chawi an ni a, an vai hian Distinction-a pass vek an ni. HSSLC ah 154 chawimawi an ni a, Distinction ah mi 19 leh First Division a pass mi 135 te an ni.
PC Ngoliantluanga, Orgnising Committee Chairman kaihhruainain Zaa za pass school 16 te hnenah chawimawina hi hlan an ni ve bawk.
