Hnahthial Post | May 16, 2026, Aizawl: Nimin (15 May)chawhnu khan Chief Secretary Conference Hall, Mizoram Secretariat Building No.1, MINECO-ah Disaster Management & Rehabilitation (DM&R) Department changtu Minister Prof. Lalnilawma kaihhruaina hnuaiah DM&R official te leh District tin Bawrhsap te chuan kan hma lawka furpui lo thleng turin chhiatrupna leh harsatna hrang hrang a thlen thlulh a,kan inpuahchahna leh a kaihhnawih thil pawimawh hrang hrangte sawihona meeting an nei a. He meeting-ah hian Aizawl district tiam lovin, District danga Bawrhsap te chuan Video Conferencing kal tlangin meeting hi an chhim a ni.
Minister chuan Bawrhsap zawng zawng te nen Furpui lo thleng tur tinzawna, a chhiatna leh harsatna hrang hrang lo thleng theih tur laka lo inpuahchah dan tur leh lo inven lawk dan tur te, chhiatna lo thlen thulh a, a tihziaawm tura hmalak dan te sawihona meeting kan neih theih hi ka lawm hle a ni, a ti. District-a chhiatna a lo thlen palh pawha rang taka pui turin sawrkar chu an in buatsaih reng thu sawiin, District hrang hrangte report aṭangin Minister chuan district ten District Focal Person neih te, Department District Monsoon Action Plan neih te leh Resource Assessment neih te chu ṭha a tih thu a sawi tel bawk a ni. Minister chuan fur hun hmaa inbuatsaih lawkna, department hrang hrang thawhhona leh chhiatna hlauhawm a thlen pawha rang tak hmalak a pawimawhzia sawiin, mipui himna turin hmalakna chak zawk neih chu a ngaih pawimawh thu a sawi. Minister chuan kan ṭanrual chuan he furpui lo thleng tur hi kan hmachhawn thei ang, a ti.
 |
| Advertisement |
Meeting-ah hian DM&R , Secretary leh Commissioner ni bawk Pu Udit Prakash Rai chuan Mizoram sawrkarin tun thlaruk chhunga DM&R hnuaia hmalakna pawimawh zualte a tarlang a- National Landslide Risk Mitigation Project - district pali (Aizawl, Saiha, Serchhip leh Champhai) a neih mek te, National Earthquake Risk Mitigation Project - district pali ( Lunglei, Saiha, Champhai leh Aizawl) a neih mek te leh Post Disaster Need Assesment chu Mizoram chhungah kalpui a nih thu a sawi a. Hmanni lawka tlangzarh “Khuarel App” hmangin mipui mimir pawhin chhiatna thleng te an report zung zung thei tawh thu leh mipui ten kan hman ṭangkai a ṭul thu a tarlang bawk.
Ṭhuthonaah hian furpui lo thleng tura district hrang hrang te in buatsaihna leh SDRF/SDMF hnuaia an hmalakna tawhna leh hmachhawp hrang hrang te, Monitoring an kalpui dan te leh SDRF/SDMF hman dan tura project bawhzui hmasak tur(Prioritize) ruahman dan tur te leh rualkhai zawka hmalak dan tur sawiho a ni a. District Bawrhsap leh District Disaster Management Authority Chairman ni bawk te chuan an District chhunga an hmalak tawhna leh hmachhawp te report pein, an harsatna hrang hrang leh thurawn an nei te pawh an sawi bawk a ni.Heng bakah hian disaster risk reduction, emergency response preparedness leh district administration-te thawhhona tihchak chungchangte sawiho niin, Bawrhsapte chuan an district-a disaster resilience tichak tur leh mipui himna tura theitawp chhuaha hma an lak chhunzawm mek zel thu an tarlang bawk.
Nimin ṭhutkhawmnaah hian DM&R dept. atanagin Secretary & Commissioner Pu Udit Prakash Rai, DM&R Director Pu Chuauhnuna, DM&R officials dang te leh ADDMA aiawh te bakaha district tin a bawrhsap ten video conference kaltlangin kokim takin he meeting hi an chhim a ni.
Tags
News