Hnahthial Post | June 25, 2026, Aizawl: Vawiin khan Mission Director Office chamber-ah National Health Mission (NHM) Director Dr. R. Lalchhuanawma kaihhruainain State TB Forum Meeting neih a ni.
Mission Director chuan thusawiin, Mizoram-a TB natna vei an pun zel loh nan leh TB umbo anih theihna atana ṭhahnemngai leh rim taka thawktu National Tuberculosis Elimination Programme (NTEP)-a State TB Officer leh thawktute chungah lawmthu a sawi a. TB natna umbo a nih zel theihna atana theihtawp chhuaha, taima taka thawk zel turin a chah bawk.
State TB Officer & Jt. Director (TB) Dr. Zochhuanawmi chuan Powerpoint presentation hmangin hnathawh dan hrang hrang a sawifiah a.TB damlo chhawmdawlna programme Pradhan Mantri TB Mukt Bharat Abhiyaan - Nikshay Mitra Initiative kalpui mek a nih thu a sawi a. He hmalakna atan hian Minister, MLA leh Sawrkar Official ten Food Basket hmanga TB damlo an ṭanpui mek 103 an awm thu leh TB damlo Food Basket dawng mek zat 374 an awm thu a sawi. TB natna vei inenkawl zinga 28% vel chiahin Donor an nei a, Donor neih belh zel an duh thu a tarlang bawk.
Hetiang hian January - June 2026 chhunga TB report tlangpui tarlan a ni:
1. TB rinhlelh test zat - 61246
2. TB damlo hmuhchhuah zat - 1087
3. Kum 14 hnuai lam TB vei zat - 68 (6.5%)
4. Kum 14 chunglam TB vei zat 977 (93.5%)
5. Mipa TB vei zat - 600 (57%)
6. Hmeichhia TB vei zat - 445 (43%)
7. MDR - TB hmuhchhuah zat - 47
8. Chuap TB vei zat - 520 (49%)
9. Chuap pawn lam TB vei zat - 538 (51%)
10. TB-HIV vei kawp hmuhchhuah zat - 92
11. TB vanga thi - 71
12. TB tihdam zat - 86.49%
TB umbona atana campaign kalpui mek TB Mukt Bharat 100 Days campaign-ah khua leh vengah screening runpui neih thin a ni a, heta inentir tam ber hi kum 50 chunglam an ni. TB veiah hian kum 15 leh kum 45 inkar an tam ber avangin screening neihah kum valai zawk te an kal ṭha lo ṭhin chu harsatna lian tak a ni tih sawi lan a ni a. College zirlai te, office a thawk kum valai te, kum 15 leh 45 inkar hrim hrim te chu a tam thei ang ber screen an nih theih nan hmalak a ngaih thu tarlan a ni.
TB damlo hospital admit mamawhte tan Sawrkar hospital-ah ICU khum 1 leh general ward-ah khum 5 te hauhsak an nih theihna turin hmalak ni se an ti a.
TB damlo chaw ṭha hmanga chhawmdawltu Donor zawn kawngah hmalakna tur hrang hrang te sawiho a ni bawk.
Meeting-ah hian Director of Health Services Dr. Lily Chhakchhuak, DHME Addl. Director Dr. Catherine Ngurbiakveli, School Education Department Jt. Director Pu PC. Lalngaizuala te bakah MSACS, ICT Dept., ZMC aiawh leh NHM Official engemaw zat telin, TB Survivor sawm bik ṭhahnem tak an tel bawk a ni.
Tags
News