Minister Pu Lalnghinglova Hmar hovin "Emerging Trends and New Challenges Faced by Mizoram" tih thupui hmangin seminar neih a ni

Hnahthial Post | June 23, 2026, Aizawl: Vawiin khan Lianchhiari Conference Hall, I&PR Department-ah "Emerging Trends and New Challenges Faced by Mizoram" tih thupui hmangin seminar neih a ni a, Excise and Narcotics Minister Pu Lalnghinglova Hmar chuan khuallian niin hun a hmanpui. Seminar hi Social Welfare Department, Women and Child Development Department, DC Aizawl, Health and Family Welfare Department, Mizoram Police, Excise and Narcotics Department, DIPR, Higher and Technical Education Department, IG Prison, School Education Department, 23 Sector Assam Rifles, BSF, MRH&CD, MSACs, CYMA, MKHC, MDUF, FINGODAP, SLCA NE III- te ṭangkawpa buatsaih a ni.

Minister Pu Lalnghinglova Hmar khuallian ni bawk chuan thusawiin Mizoram sawrkar leh Pawl hrang hrangten nasa takin ruihhlo do chungchangah hma an la a, chutihrualin tun aia nasa lehzual a ṭan lak angaih thu a sawi. Mizoram chu ram zim te anih bakah mihring cheng pawh kan tam loh avangin kan ṭanrual phawt chuan ruihhlo dona kawngah beisei tur a awm a ni, a ti.

Pu Sushil Singh, Director, Social Welfare department chuan kalkhawmte lawmna thu sawiin, Seminar hi ‘International Day Against Drug Abuse and Illicit trafficking’ puala buatsaih anih thu a sawi a. Mizoramah Sorkar, Kohhran leh khawtlang thawhhona a ṭhat avanga lawmawm a tih thu sawiin Damdawi hmansualna hi harsatna lian tak a ni a, inzirtirna (awareness) kawngah pawh nasa taka hmalak a ṭul thu a sawi bawk.

Pu C.Lalruaia, Secretary, Excise& Narcotics Department pawhin thusawiin, Mizoramin ruihhlo do kawnga kan mamawh leh kalphungthar tur duan lawk a, thiamna sang zawkte hmang tangkaia inher rem zel a pawimawh thu a sawi a ni.

Seminar-ah hian thiamna nei hrang hrangten thupui pawimawh tak tak hmangin presentation an nei a; Pu Peter Zohmingthanga, Jt. Commissioner, Excise & Narcotics Department-in ‘Emerging Trends in Drug Abuse: Perspectives on Supply Reduction’ tih thupui a sawi a, Dr. RL. Sanghluna, Director, Synod Hospital-in ‘Medical aspects of addiction and the current challenges in care & treatment’ a sawi a, Pi Vanlalhruaii , MSD & RB, Directorate of Social Welfare-in ‘ Drug Demand Reduction: Strategies for Addresing Emerging Challenges’ tih thupui a sawi bakah Pu Lalremruata, President, Mizoram Drug Users Forum( MDUF) pawhin ‘Community perspective on emerging trends and challenges’ tih thupui a sawi bawk a ni.

He hun hi Pu Lalramdinsanga’n a kaihhruaia, Presentation neih zawhah hian sawihona leh zawhna leh chhanna hun hman chhunzawm nghal a ni.