Hnahthial Post | June 24, 2026, Hnahthial: Nimin khan Hnahthial Govt High School-ah DC Office leh School Education Department tangkawp chuan Middle school leh High School & Higher Secondary School zirlaite tan Nasha Mukt Bharat Abhiyan hnuaiah International Day against Drug Abuse & Illicit Trafficking pualin Drawing competition an buatsaih a. Middle school atang hian zirlai 30 telin High School leh Higher Secondary School atang hian zirlai 32 an tel a ni.
Lemziaka inelna hi tlai dar 01:30 atang khan neih tan niin tlai dar 03:00 thleng neih a ni a. 'Say No to Drugs' chu thupuiah hman niin Category hnih, Middle School leh High & Higher Secondary School te tan inelna hi buatsaih a ni.
Lawmman pakhatna hian Pawisa fai Rs. 3000 leh citation dawngin Pahnihna hian Rs. 2000 leh citation a dawng ang a. Pathumna hian Rs. 1000 leh citation dawngin zirlai pahnih hnenah consolation prize, Rs. 500 leh citation hlan an ni bawk ang.
June ni 25 (Thursday) hian Nasha Mukt Bharat Abhiyan pualin Grand Rally (Ruihhlo Dona Kawngzawh) neih tur niin zing dar 9:15 atangin hmun hnih, Nauhruaikawn leh Electric Veng Volleyball court atangte a kawng hi zawh tan tur a ni dawn a. Bazar shed kawt thleng hi kawng zawh tur niin chuta program hman hunah chuan lawmawm hi sem a ni ang. He hunah hian Legal Awareness Campaign leh Drugs Abuse Awareness Campaign neih tura ruahmanna siam a ni bawk.
Tags
News