Hnahthial Post | June 24, 2026, Hnahthial: Vawiin khan Hnahthial DC Meeting Hall No-I ah District Level Monitoring Cell (DLMC) Chairman leh Bawrhsap ni bawk, Pi K.Vanlalruati kaihhruaiin DLMC thutkhawmna neih a ni a. Hnahthial District chhunga LPG leh POL dinhmun bakah agenda hrang hrangte sawi ho a ni.
DCSO leh DLMC Member Secretary ni bawk, Dr. Michael Solo hnen atangin Hnahthial District tana LPG leh POL stock dinhmun ngaihthlak a ni a. Report ngaihthlak zawh hnu hian Bawrhsap chuan khawvel pum buaina avangin Hnahthial pawhin harsatna an tawk ve ni a lan thu a sawiin chumi a nih rual chuan mipui mamawh phuhruk tur khawpin stock a la that thu a sawi a. Petrol leh Diesel ah phei chuan thlaphanna chhan tur engmah aw awm loh thu a sawi bawk.
Bawrhsap chuan LPG Distributor-te chu mipuite harsatna hriatthiampui tura chahin tawngkam hawihawm nen mipuite lo thlamuantu ni thin turin a chah a. Chutih rual chuan a hma anga stock tam a awm thei tawh lo tih mipuite chuan lo hriatthiampui se duh thu a sawi a ni.
DCSO chuan LPG stock chu duhthusamin tam lo mah se mipuite mamawhna phuhruk tur khawp chu a awm thu a sawi a. Petrol leh Diesel-ah erawh harsatna engmah a awm loh thu a sawi a ni.
Thutkhawmnaah hian Addl DC, Pu Zothanmawia Khiangte bakah Hnahthial District Consumer Union hruaitute, CL Indane leh Fidelia Indane neitute leh Hnahthial Mizofed leh Johannapa Filling Station neitute thukhawmin DAC chungchanga harsatna te, dan phal chin baka Petrol leh Diesel hralh chhuah chungchangte leh pawimawh dang hrang hrangte sawi ho a ni.
Tags
News