Chief Minister-in Police Constable 70th Batch Passing Out Parade a hmanpui

Hnahthial Post | July 18, 2026, Thenzawl: Vawiin khan Thenzawla Police Training School (PTS)-ah 70th Batch of Police Constable Passing Out Parade chu Chief Minister Pu Lalduhoman Khuallian niin a hmanpui a. Home Minister Pu K Sapdanga chu Khual Zahawm a ni.

Chief Minister chuan vawiina Constable Pass Out zawng zawngte leh an chhungte chu a lawmpui thu a sawi a. Sawrkar hnate chu Equality for All Principle chang chawiin dik tak zelin lak a ni a. Thalaite pawhin sawrkarah rinna an nei thar zel a ni. Vawiina kan hmaa ding kan Police thar 275 te pawh hi, duhsak bikna emaw, sawipuitu Minister leh Politician tel lo va, intihsiakna fair tak kaltlanga tlingte an ni a. An chhuanawm a ni.

Hnathawktu Qualify-te hian kan ram tan Quality Service min pe ang tih hi kan ring a. Nangni pawh hi chutianga hna rawn thawk tur chuan kan beisei zui dawn che u a ni. Kan sawrkar hian service tha kan duh avangin Qualify lo te chu huai takin kan hnawl a. Hnathawktu lak tharah chauh hei hi kan kalpui lo va, tuna a thawk mekte zingah pawh chhawr tlak lohte dapchhuahna hna hi kan kalpui a ni.

Khawvel ram tin hi han zir chiang ila, Police tha nei ramah khawtlang nun a ralmuang thin. Police nungchang tha leh service tha chuan ram leh hnam hmel an timawi a, mipuite min thlamuan a, sawrkarah lungawina min pe a. Nangni, a tling leh tlak thlan khawmte hian mipuite min thlamuan a, kan khawtlang nun leh kan ram leh hnam tihmawi hna hi in rawn thawk turah kan ngai a ni.

PTS-ah hian hapta 45 chhung in hnathawhna lama in mamawh thiamna chi hrang hrang in zir a. Tunah chuan hnathawk tura chher hriam, inpeih at in lo ni ta. Inringtawk taka hna thawk turin theihna in nei tawh a ni. Police hna in thawhna kawngah te, dan bawhchhetute in chhuina kawngah te, misual in chhui chhuahten hremna an hmuhna tura hma in lakna kawngah te tu mitmei mah rawn veng suh u. Dik takin thawk ula, dan hi lal rawh se. Kan sawrkar hi “Mizoramah Pathian ram lo thleng rawh se” titu sawrkar kan ni a. Dikna tun din hi kan thupui a ni.

Mizoramah hian Zu vanga service laia thi police kan ngah thin a. Police-te hi taksa hrisel tak nei tura beisei in ni a, service-a lut tur pawhin physical fitness exam a tel a. Training tinrengah fitness a tel zel a. A taka hna in thawh hunah pawh physical fitness hi chhawm zel tur a ni. Police tihhmasawn hna hi kan la kalpui zui zel dawn a, sualna lo chhuak thar zelte hmachhawn thei tur leh misualte hmakhalha kal zat zat thei tura thuam chak kan duh, a ti.

Mizoram DGP Pu Sharad Agarwal-a pawhin Trainees-ten tluang taka an training an zo thei chu a lawmpui thu a sawi a. An rilru leh an taksa tuai hriam reng tura inthunun turin a chah bawk.

Vawiina Police Constable Pass out te hi mipa 249 leh hmeichhia 26, an vaiin mi 275 an ni a. Trainees te hi Armed branch atangin mi 198, Unarmed branch atangin mi 51, Mechanical branch atangin mi 8 leh Compassionate grounds-in mi 18 te an ni. Training neih chhunga ti tha bik thlanchhuahte hnenah Khuallian hian lawmman a hlan a. Lawmman dawngtute chu:

1. Governor running trophy and gold medal All Round Best - F Lalngaihzuala

2. Chief Minister running trophy and gold medal Proficiency in drill - H Lalremruata

3. Home Minister running trophy and gold medal Proficiency in legal studies - Women Vanlalawmpuii

4. DGP Mizoram running trophy and gold medal Proficiency in general studies - Tluangzathanga Zahau

5. Additional DGP running trophy and gold medal Proficiency in weapon - K Lalhmangaihzuala

6. IGP (Hqrs) running trophy and gold medal Proficiency in physical training - Zirnunsanga

7. Principal Police Training School running trophy and gold medal exemplary conduct – F Lalngaihzuala

8. DIG (Training) running trophy and gold medal proficiency in shooting - Richard J Lalthanmawia