.jpeg)
Hnahthial Post | July 20, 2026, Aizawl: Vawiin khan I&PR Mini Theatre-ah Chief Minister Pu Lalduhoma chuan Vanapa Hall & Park Architectural Design lawmman a dawngtute hnenah a hlan.
Assam Rifle ram chhuahsana hmalakna kal meka Nodal Department UD & PA Department buatsaiha neih a ni a, Pu K. Sapdanga, UD & PA Minister chu khualzahawm a ni.
.jpeg)
Thusawiin Chief Minister chuan, Aizawl hi a tirah Saphoten an thiam ang angin lo Plan ve a, mahse ziaka inhnutchhiah engmah a awm lo va. Zalenna kan hmuh hnuah a tlachawp zela ngaihtuah chungin kan luah chho ta a ni.
Hma kan sawn zel a, a hunlaia kawngpui zau tawk tak nia kan ngaih kha tunah chuan a lo zau tawk ta lo va, Hall lian tham tak nia kan ngaih kha an lo te ta a, kawngpui zau zawk te, puipunna hmun tha zawk te, park nuam takte kan mamawhna a lo sang ta a ni.
.jpeg)
Aizawl lailia Assam Rifle luah ram chu Pathian zarah mipui kuta a lo awm ta a. A hman dan tur ngaihtuahtu tur Advisory Committee, mipui zawng zawngte aiawh zo kan din a, hmalakna tur a duang a, Master Plan a siam a, chung zingah chuan Vanapa Hall thar sak hi a tel a.
Advisory ruahmannate hi ram danga khawpui mawi tak takte mitthla chung a, rualelna thinlung pu a, kan ram hmel lanna tur, kum tam tak lo la awm tur thlenga kan tangkaipui tur ngaihtuah chunga kalpui a ni. Vanapa Hall & Park pawh hi khawpui laili taka awm tur, puipunna hmun langsar ber tur a nih angin; mawi si, tha si, him si ni se kan duh a. Miin Aizawl an mitthla ruala an mitthlaa lo lang ve nghal tur centre mawi tak sak kan duh a ni. Chutiang Hall leh Park mawi sak dan tur chu Architectural Design Competition buatsaih hmanga thlan hi thain kan hre ta a. UD & PA ten an bawhzui a, vawiinah a hmawr kan lo bawk thei ta a ni.
.jpeg)
Kan winner Pu Lalrinzuala Ralte hi 35th JK Indian Architect of the Year 2026 lawmman dawngtu a ni tih ka lo hria a. India rama Architect thiam ber kuta Vanapa Hall & Park design a awm hi a lawmawm hlein ka hria. A sakna tur hi sum ruahman sa la awm lo mah se, PM-DevINE hmanga sak kan tum dawn a. Concept paper leh DPR te chak takin kan umzui dawn nia, a ti a. Inelna buatsaihtute chungah leh inelnaa tel zawng zawngte chungah lawmthu a sawi a ni.
.jpeg)
Khualzahawm Pu K. Sapdanga pawhin thu sawiin, Aizawl hmel thar, changkang tak, mipuiten an hman tangkai tur, miten an tlawh chak em em tur sorkarin a duang mek a. A taka chantir thuai kan tum a ni, a ti.
Lawmman pakhatna dawngtu hi Catalyst Architecture Studio an ni a, a neitu hi Pu Lalrinzuala Ralte, 35th JK Indian Architect of the year 2026 dawngtu a ni. Vawiin hian Pu Lalrinzuala Ralte hian an Hall & Park design hi a lem nena entirin sawifiahna a nei a ni.
Inelna hi kumin March ni 17 khan neih tan a ni a, Firm 33 in an tel a, an zingah hian state pawn lam firm te pawh an awm a. Thehluh hun tura hun tiam 15th May khan Firm 16 in an Design an thehlut a, an zinga 14 chu pawm a ni a. Endiktuten endikna chi hrang hrang an kalpui hnuah a titha zual firm paruk (6) an thlang leh a, chung mite chuan an Design chu endiktute hmaah sawifiahna an nei leh a, endikna kalpui nan hian thla thum chhung zet hun hman a ni. Tichuan vawiinah lawmman semna hman theih a lo ni ta a ni.
Architectural Firm pathum (3) te hnenah Consolation Prize leh firm dang pahnih (2) hnenah Honorarium hlan an ni a, chungte chu:
Consolation Prize (Certificate of Appreciation) dawngtute chu:
1. Studio Hamlet
2. Forbattra Architects
3. Tiberia
Honorarium dawngtute chu:
1. Okahito Consultancy Services
2. HTL Architecture & Landscape Design Studio
Pi Lalengzuali, Chief Architect, PWD chuan endiktute aiawhin endikna an kalpui dan tlangpui a sawi a. Ram changkang zawka vantlang hmunhma tha tak takte hi Architectural Design intihsiakna hmanga sak an ni fo thin a, Mizoram sorkarin chutiang rilru pu phaka he intihsiakna a kalpui hi a changkangin a tunlai em em a. Intihsiakna pawh hi Council of Architecture duh dan mila kalpui a ni, a ti.
Lawmman semna inkhawm hi Pu V. Lalsangliana, Commissioner & Secretary, UD & PA chuan a kaihruai a, Pu CC Lalchhuangkima, Addl. Secretary, UD &PA chuan lawmthu sawiin inkhawm a khar a ni.
UD & PA hian Vanapa Hall & Park Architectural Design Exhibition hi an kalpui nghal a, tun thla ni 22 thleng, I&PR Conference Hall-ah tlawh theih a ni ang.
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)