Govt. Khawzawl College-ah ‘One-Day National Level Workshop on Mizo Ecological Worldviews through Cheraw Dance’ neih a ni

Hnahthial Post | Aug 17, 2026, Aizawl: Vawiin khan Department of History, Govt. Khawzawl College buatsaihin nikhat awh ‘One-Day National Level Workshop on Mizo Ecological Worldviews through Cheraw Dance’ chu Multipurpose Hall, Govt. Khawzawl College-ah neih a ni a. Pu PC. Lalrindika, Head of Department, Dept. of History chuan hun a kaihruai a, Pi Lalruatmawii, Principal, Govt. Khawzawl College chuan kalkhawmte lawmna thu a sawi.

Vawiin workshop-a Resource Person Pi Shilpika Bordoloi, Associate Professor of Practice, Ahmedabad University hi 'Mau : the Spirit Dreams of Cheraw' film Director niin, he film hi 71st National Film Award 2025-ah Best Debut Film of a Director lawmman President of India hnen atangin a lo dawnpui tawh a ni.

He documentary film-ah hian Govt. Khawzawl College-a zirtirtu te chuan tha an thawh hnem hle a. Script writer hi Pu PC. Lalrindika, Asst. Professor, Dept of History niin, Narrator hi Pi Lalramlawmi, Asst. Professor, Dept.of English a ni bawk a. Pu PC. Lalrindika M.phil thesis ‘Bamboo And Mizo Society: A Historical Study’ behchhana siam niin, International Film Festival of India 2023, Goa-a neihah khan a tha zual thlanchhuah (premiere) zingah a lo tel tawh a ni.

Resource Person Pi Shilpika Bordoloi chuan Mizo te leh Mau inkungkaihna thuk zia ngaihnawm taka sawiin, an film siamah hian nu raicheha thi thlarau zinkawng Cheraw lam mawi tak hmanga thlahliam a nih dan tarlan a nih thu a sawia. Mizo-te leh Mau inzawmnghehzia documentary film-a an tarlan chu ram dangte pawhin ngaihnawm an tih thu a sawi a. He film hi International level film festival-ah chhuah tura sawmna an dawn thin thu leh USA leh Germany atang te pawha sawmna an dawn thin thu a sawi.

Inkhawmah hian he film hi en ho niin zawhna leh chhanna hun hlawkthlak tak hman a ni bawk a ni.