Hnahthial-ah Independence Day vawi 80-na ropui taka lawm a ni

Hnahthial Post | Aug 15, 2026, Aizawl: India ram Zalenna ni vawi 80-na chu khuallian, Pu Lalthansanga, EF&CC, Sericulture, Fisheries leh LRS&WC Deptt. Minister hovin Hnahthial District Synthetic Turf Ground-ah ropui taka lawm a ni a. Khuallian chuan India Hnam Puanzar pawt pharhin Parade contingent 13-te chibai a chhang let a ni.

Khuallian chuan kalkhawm zawng zawngte duhsakna hlanin zalenna kan neih theih nana thawktu kan ram hruaitu hmasate zahna chibai a buk a. Zalenna kan neih avanga mahni a ro inrel chunga, mahni duhna lam lam kan hawi thei chu a hlutzia hre thar leh tura chahin Hnahthial ngei pawh kum sarih lai mai District a lo nih tak hnuin hmasawnna hrang hrang hmuh theihin a awm thu a sawi a. Department hrang hrang kaltlanga hmasawnna hnahthawh langsar zual thenkhatte a tarlang nghal a ni.

EF&CC Dept hmalakna zarah ram kang sawi tur a awm loh thu sawiin thingtiak thahnem tak phun a nih thu a sawi a. Fisheries Department hnuaiah luidung nungchate humhalh nan YMA hnenah CCTV an pek chhuah thu te, Sericulture Department hnuaia buhchium(cacoon) thar chhuak tura pangang tui sem a nih dan te a sawi bawk.

Works Department hnuaia hmalakna hnathawh hrang hrangte sawiin Transport Office hawn hnuah June thla thleng khan lirthei 247-an in register tawh thu te; DCSO atangin ration card 6538 pekchhuah a nih tawh thu te; CDPO leh DCPU ten hmeichhia leh naupangte tana an hmalakna te a tarlang a ni.

Govt. Hnahthial College chuan Mizoram pum huapa result tha tak an neih thu sawiin zirna tih hmasawn nana Education Department hmalakna hrang hrangte a sawi a. DRDO leh BDO hnuaia MGNREGA hnathawh dante tarlangin DUDO hnuaia Solid Waste Management Center, Rotlang ‘E’ a sak mek chu peih fel thuai theih beisei a nih thu a sawi bawk.

Agriculture & Farmers’ Welfare Department chuan Bana Kaih Scheme hnuaiah Hnahthial District tan kumin chhungin sawhthing quintal 1263.859 an lei thu a sawi a, a lei nan cheng vbc hnih leh nuai sawmkua pasarih (Rs. 2,97,40,574) zet sen a nih thu a sawi bawk. Horticulture Department hnuaia scheme hrang hrang kalpui dante tarlan chhunzawmin School of Agricultural Sciences leh KVK hnuaia hmalaknate a sawi a ni.

Mizoram Universal Healthcare Scheme (MUHCS) chu District Hospital, Hnahthiala damlo in admit 80% ten an hman tangkai thu leh Hnahthialah ngei Endoscopy tih theih a ni ta chu lawmawm a tih thu a sawi bawk.

Excise leh Police te hmalakna hrang hrang tarlangin zu leh heroin thahnem tak an man tawh thu leh FY 2025-26 chhung khan Taxation Department chuan cheng vbc 3 leh a chanve vel (Rs. Rs. 3,48,55,278) an khawn thu a sawi a ni.

Commerce & Industries department-te chuan puan tahna khawl thahnem tak an sem thu sawiin AH&Vety Department hnuaiah vawk 513 an insure tawh thu a sawi a. Revenue Department chuan pass 98 an siam tawh thu leh ram buai 29 an chinfel tawh thu tarlangin District inrelbawlna kawnga DC Office hmalaknate a sawi a ni.

Hnahthial District sawrkar pisa hrang hranga thawktute thawhrimna chu chhuanawm a tih thu sawiin Independence Day hmang tura kalkawm zawng zawngte chu Hnahthial District hmasawn nana ke pen zel turin a sawm nghal bawk.

Khuallian thusawi kimchang: https://www.hnahthialpost.com/2026/08/thusawi-honble-minister-pu-lalthansanga.html

Hnahthiala Independence Day,2026 lawmnaah hian SI Lalzuitluanga chu Parade Commander niin ASI, Lalmawizuala chu 2nd Parade Commander a ni a. School contingent 11 awmin NCC Contingent pakhat an awm a, 2nd battalion English Middle School Pipe Band,Lunglei an tel bawk a ni.

Khuallian chuan lawmman semna hun a hmang nghal a, lawmman leh lawmman dawngtute chu:

I. Independence-Day March Past Award :

1st Prize : FD Higher Secondary School

2nd Prize : Govt Southern High School (Boys)

3rd Prize : Moriah Public School (Boys)

II. Kangmei laka invenna (Fire Prevention Award) :

1st Prize: Thingsai VC ( Rs. 75,000 leh citation)

2nd Prize: Hnahthial North-I VC (Rs. 50,000 leh citation)

3rd Prize: Hnahthial South-II VC (Rs. 40,000 leh citation)

Rotlang ‘E’, Denglung leh Darzo VC te chuan consolation Prize, cheng sing khat (Rs.10,000) leh citation an dawng vek bawk.

III. MLA Award :

i) F.Lalbiaknia s/o F.Lallianmawia, Cherhlun ( 1st Position in M.A (Linguistic), Assam University)

ii) Lalawmpuii d/o MC Lianzuala, Cherhlun (3rd Position, B.Com, Pachhunga University)

iii) Malsawmzuali d/o Lianhawla, Cherhlun (3rd Position, B.A (Mizo), Govt. Hrangbana College)

iv) H.Lalvensangi d/o H.Lalrodinga, Hnahthial Chanmari Veng (3rd position in MBA (Tourism & Hospitality Management), Mizoram University)

v) H.Lalchhanhima s/o Lalhmingsanga, Cherhlun (4th Position in B.A (Mizo), Govt. Hnahthial College)

vi) Esther Tialsuicheri d/o Tialhnima, Thingsai (4th Position in B.A (Economics), Govt. Thankima College)

vii) Noel Lalramnghaka s/o H.Lalrodinga, Hnahthial Electric Veng ( 8th Position, MBA (Tourism & Hospitality Management), Mizoram University)

viii) Lalrammuanpuia s/o Biaksangpuia, Bazar Veng, (2nd Prize, MSc. ( Biotechnology) )

Lawmman semna neih zawh hian hnam puanzar chibai bukna neih niin hun hi khar a ni a. Hemi zawh hian khuallian chuan DC Bungalow-ah sawm bikte nen ‘VIP At Home’ a nei nghal a ni.