Khawzawlah Independence Day vawi 80na ropui taka lawm a ni

Hnahthial Post | Aug 16, 2026, Khawzawl: Nimin (Aug 15) khan India ramin zalenna a hmuh ni, Independence Day vawi 80-na chu Mualvawm Field, Khawzawlah zing dar 9-ah lawm a ni a. District Council & Minority Affairs, Art & Culture, Animal Husbandry & Veterinary leh Horticulture Department Minister Pu C. Lalsawivunga chu Khuallian a ni.

Independence Day lawmnaah hian Khuallianin Hnam Puanzar pawt pharhin, Hnam Puanzar chibai buktu parade contingent 15-te chibai buk a chhang let a. Independence Day thuchah a sawi nghal.

Khuallian Pu C. Lalsawivunga chuan Independence Day vawi 80-na ni chhinchhiah tlâk takah hian Khawzawl District mipuite, Mizoram chhung leh ram pawna mite zawng zawng duhsakna chibai a buk a. He ni ropui takah hian India ramin zalênna kan neih theihna tura mahni inphata, nunna thâpa beitu, hruaitu ropui tak takte bakah zalênna sualtute thlâwp tlattu mipuite inpekna ropui tak kha kan zavaiin kan hriat thar leh a pawimawh a ni, a ti. Independence Day lawmna atana rim taka thawktu zawng zawng te chungah te, Parade Contingent-te, zirlaite leh mipui lo kal khawm zawng zawngte chungah lawmthu Minister chuan a sawi a ni.

Khuallian chuan Khawzawl District chu kum 2019-a a lo din atang khan hma a sawn chak em em thu sawiin, District chhunga sawrkar hmalakna leh hmasawnna hna thawh hrang hrangte a tarlang.

Khuallianin thu a sawi zawh hian ceremonial parade lawmman bakah, chawimawina leh lawmman dang sem zui nghal a ni a. Ceremonial parade-ah hian armed contingent 1, unarmed contingent 3 leh school contingent 11 an awm a, an parade chhungin Govt Khawzawl High School Pipe band-in rimawi an tum sak a ni. Sub-Inspector Lalhmuakliana chu Parade Commander niin, Sub-Inspector Lalrosanga Parte chu 2nd Parade Commander a ni a. Parade commander-te bakah, school contingent titha te hnenah lawmman sem niin, band party, armed contingent, unarmed contingent leh school contingent dang 8 chu participation prize pek an ni bawk.

Independence Day 2025 ceremonial parade-a school contingent zinga ti ṭha lawmman dawngtute chu:

(1) Pakhatna – PES Khawzawl 1st Contingent

(2) Pahnihna – PES Khawzawl Vengthar Girls’ Contingent

(3) Pathumna – Far East Experimental School

Ceremonial parade lawmman bakah hian Independence Day 2026 pualin chawimawina leh lawmman dang sem a ni a. Superintendent of Police, Khawzawl chuan November 28, 2025 khan Khawzawl DEF Special Team a din a. He Special Team hi ruihhlo do khawl ber niin, a sur a sa hnuaiah zankhaw tairek pawh pawisa lovin Khawzawl District hmun hrang hrangah an nunna thap tak meuhin duty ngawrh takin an nei thin a. An Team leader ASI Lalneihsanga chuan kumin Independence Day hian Governor Silver Medal a dawng a. Vawiina Khawzawla Independence Day lawmnaah hian Team member te - Head constable PC Lalzarmawia, Constable Richard Lalsangzela, Constable Vanlalchhuanga leh Constable Ramdinzela te hnenah Khuallian chuan lawmman a hlan bawk.

Kumin World Water Day-a Mizoram khua zawng zawng zinga Village Water and Sanitation Committee (VWSC) Chairman ṭha ber lawmman dawngtu Pu Zoramchhana, Khualen VCP hnenah lawmman Khuallianin a hlan bawk a. Pu Zoramchhana lawmman dawnna category hi ‘Distinguish Sarpanch for Outstanding Leadership in Rural Piped Water Supply Management’ niin, tuihna venhim leh khawchhung tuilak enkawl ṭhat kawnga a thawhhlawk em avanga he lawmman hi a dawng a ni.

Mualvawm Field-a hun hman zawh hian DC Bangla-ah sawm bikte tan Khuallian hova inkawm hona, 'At Home' programme buatsaih niin, SHG-te thil siam chhuah a duh apiang tan lei theih turin pholan a ni a, ruai kil ho nghal a ni.