SDEO Hnahthial buatsaihin ULLAS puala Literacy Fortnight kawng zawh a ni

Hnahthial Post | Sep 8, 2026, Hnahthial: Kum 15 chin chunglamin ziak leh chhiar an thiam vek theihna tur atana sawrkar laipui hmalakna – ‘Understanding of Lifelong Learning for All in Society” (ULLAS) pualin tukin zing dar 7 khan SDEO, Hnahthial Office chuan “Rally for ULLAS Literacy Fortnight” an buatsaih a, zirlai za vel bawrin kawng an zawh a ni.

SDEO, Pu S.Lalthanzuala chuan rally tanna hmun, Bazar building tual zawlah thu sawiin ULLAS chungchang sawi zauna hun a hmang a. ULLAS thil tum ber chu India khua leh tui zawng zawng ziak leh chhiar thiamtir a nih thu sawiin chumi a thlen theihna tur atan chuan zirlai kalkhawmte chu an pawimawh thu a sawi a. Mizoram chu fully literate state-ah puan ni tawh mah ila a nihna takah chuan ziak leh chhiar thiam lo kan la awm nual thu sawiin chutiang pui tura inhrilhhriatna atan he rally hi neih a nih thu a sawi a ni.

DIPRO, Pu F.Lalrinfela chuan rally kharna hmun, HDVA Court-ah thu sawiin zirlai naupangte chu ULLAS hnuaiah chuan zirtirtu an nih thu a sawi a. Literacy hian lehkha ziak leh chhiar mai bakah Digital leh Financial literacy-te a huam tel thu sawiin zirlaite chu hetiang lamah inchhiar zau va, upa zawkte pawh pui thin turin a chah a. Ziak leh chhiar kan thiamna hi eng atan nge kan hman dawn tih ngaihtuah ngun tura zirlaite chu chahin kan thiamnate chu midang hmuhsit leh diriam nan ni lo va, midang dawm kan nana hmang theuh zawk turin a chah a ni.

ULLAS puala kawng zawh hi Bazar tual zawl atanga HDVA Court thleng neih niin sikul naupang bakah SDEO Office-a thawktute leh School zirtirtute an tel a ni.