Tourism Minister hovin Empowering Community Homestays Ceremonial Launch & Capacity Building (Under BANA KAIH, PM-JUGA and CSR Initiatives) Programme hmang

Hnahthial Post | Sept 3, 2026, Aizawl: Vawiin khan Tourism Deparment buatsaihin BSI HALL, Bible House-ah Empowering Community Homestays Ceremonial Launch & Capacity Building (Under BANA KAIH, PM-JUGA and CSR Initiatives) Programme hman a ni a. Tourism Minister Pu Lalnghinglova Hmar chuan khuallian niin hun a hmanpui a, Homestays 199 sakna tur a tlangzarh nghal a ni. Pu Lalmuanpuia Punte, Hrangturzo bialtu MLA leh Adviser to CM ni bawk leh Pi Baryl Vanneihsangi, Aizawl South-III Bialtu MLA pawhin vawiin programme hi chhimin, thusawina hun an hmang bawk.

Vawiin programme-ah thu sawiin, Tourism Minister Pu Lalnghinglova Hmar chuan Mizorama Rel lo lut hian kan rinphak baka tam khualzin Mizoramah a tipung a. Chung khual zin ten kan ram mawi zia, hospitality leh civic sense kan neih that zia social media lama an thehdarh te chuan khualzin dang a hip zelah, tunah chuan Aizawl leh district capital bakah thingtlang lamah pawh khualzin te hian an tlawh duh zel tawh a ni. Mahse Thingtlang lamah thlenna tur Hotel te a lo awm si lova, he tah tak hian Sawrkarin Bana Kaih tlak te puia eizawnna remchang lo siam pui hi a tum ta a ni, a ti. Pu Tetea chuan Tourist te lo kal chhan hi Hotel nuam leh ropui taka thlen beiseia lo kal an ni lova, kan ram, tlang leh lui mawi tak tak lo hmuh a, kan culture lo experience tura lo kal an ni zawk. Chuvangin kan Homestay te hi fai se, kan ei leh in siam te fai se, mikhual laka hawihhawm thiam i la, chu chu Homestay neihtu te tana pawimawh be rte zing a mi a ni, a ti.

Minister chuan Tourist Lodge hi sawrkarin sak belh a tum tawh lova, a awmsa erawh tha taka thawmthat a tum a. Sawrkar chuan Homestay promote a tum a, sumdawn a tum lova ( Government has no business being in business) , mipuite sumdawn tira, a ham thatna dawn tir hi a tum zawk a ni. Homestay hi hausakna tur khawp a ni lo mai thei, mahse eizawnna tlak chu a ni dawn a ni, a ti. Minister chuan Tourism kan sawi hian rilru hian State pawn lam mi hi a ngaihtuah nghal thin a, mahse Great Wall of China hi a tlawhtu 90% chu Chinese, Nikuma Taj Mahal tlawhtu 90.7% khan India mi, Horn Bill Festival hi kum 26 an lo kal pui tawh a, a chhimtu 75% hi anmahni Naga tho a ni. Chuvangin thlenna tur Homestay a awm chuan keini Mizo ram chhung pawh hi kan la inthlawhpawh nasa dawn a ni. Kumin kum tawpah hian Tourism department chuan Winter festival ropui tak buatsaih a tum a. kan tourism promote nan hian kawng hrang hrangin hma kan la dawn a ni. Ministry of Tourism hnenah State tin ten Project 3 theuh kan thehlut a, 13 an thlang chhuak a, chuta tang chuan thlifim lehin, 1 thlanchhuak leh a ni a, vannei thlak takin sakawrhmuituai tlang project chu thlan a ni, a ti. Tourism Department chuan vision kan nei, kan ram mawina leh khualzin hip theitur thil kan nei te hi kan promote thiam a, kan thehdarh thiam chuan tun atanga kum 5/6- ah chuan Mizoram hi Winter destination of India zingah kan chhuah thei a ni.

Kan Mizoram chhungah keimahni’n Internal tourism kan uar a, kan phochhuah thiam chuan rei lo te-ah pawn lam mi khualzin a hip thuai ang. Kuminah pawh Saichalah lo zawh hun kan hmang dawn, Aizawl tan chuan thingtlang lo zawh experience neihna tur remchang tak a ni ang. Chawngtlai leh Tualte-ah ‘Plug and pay’ ni 2 awh kan hmang dawn. Hnahsin kut behchhan in khualzin te tan Champhai leh a chhevel tlawhna tur ruahhmanna kan siam dawn. November 1st week-ah Anthurium Festival kan buatsaih leh ang. A tahtawlin Mizoram chhunga khualzian hip thei Kut leh Festival te, kan Tlang, Lui, dil te khualzin ten an hriata, an tlawh ngeina turin hma lak mek zel a ni a. Tunah hian 600 crore hmangin hmalak mek leh hmachhawp hrang hrang kan nei mek a ni, a ti.

Minister chuan tourism promote tura hma kan lak mek lai hian, kan khualzin dawn tur te hi mifel thlankhawm an ni lo tih ka hria a. Chuvangin kan culture pawl dal theih tur thil te, min tithangmawi loh thei tur thil te laka kan him theih nan CYMA nen MoU kan ziak dawn bawk a ni, a ti.Minister chuan Progress partner leh Beneficiary te chu an Homestay hmanga eizawnna ngelnghet tak an tuk ngei theih nan duhsak a hlan bawk.

Pu Lalmunapuia Punte, Adviser to CM chuan MLA 40 te, an bial theuhva Homestay 2 theuh tal awm tura Tourism Minister in ruahhmanna a siam chu lawmawm a tih thu tak zet thu a sawi a. Mizo te pawh hian chhungte ina thlen aia Hotel leh Homestay a thlen hi kum 10 vel liam ta atang kha chuan kan chingchho viau tawh a. Hetiang thingtlang lamah pawh Homestay kan lo nei zel chuan Mizoram chhungah pawh kan inzin pawh nasat phah lehzual a beisei thu a sawi. Kan Homestay te chu a pawn lamah Mizo tak siin, a chhunglam erawh tunlai tak leh fai tak ni thei se,a duhthu a sawi bawk.

Pi Baryl Vanneihsangi pawhin thu sawiin, Kan Homestay te hian khualzin ten min fakna kan Civic sense, Hospitality leh Faina te hnemnghettu in ni dawn nge? kan hmingthat ve tawhna thaichhetu a ni dawn? tih inzawt fo ang che u. A tak ram leh Social media a min hmuh dan a lo inthlauh lutuk palh loh nan tan I la zel ang u. Faina leh hawihawmna vawng rengin, Mizo cultute changkan san si lovin, changkang takin mikhual te kan lo dawnsawn theih nan, kan ei in siamah te, faina-ah te hawihawmna-ah te hmasawn zel tum turin Homestay Progress partner leh Beneficiries te ka fuih che u a, chumi atan chuan duhsakn ka hlan bawk a che u, a ti.

Mizoram chhungah Homestay 199 sak a ni dawn a. Heng Homestay 199 atanga 100 sakna tur sum (₹540.75 lakhs) hi Mizoram Flagship programme Bana Kaih atangin hmuh a ni a. He Bana Kaih Homestay hian MLA constituency 40 a huam ang. Homestay din tura thlante hi Progress Partner tih an ni a, Sum hi October thla-ah release tan tur a ni. Sum hi installment hnihin (80:20) in kan release ang. Bank account-ah transfer tur a ni. Sum dawn kim atanga thla 3 chhungin homestay hi operate hman tur a ni.- Homestay design thlan tur Tourism Department in a siam ang.

Homestay 89 sakna tur sum (₹500 lakhs)hi PM-JUGA hi DA-JGUA (Dharti Aaba Janjatiya Gram Utkarsh Abhiyan) scheme atanga hmuh a ni a. Hei hi tribal homestay scheme a ni. Mizoramah cluster hnih (Central cluster leh Southern Cluster) atan sum hi dawn a ni. Khaw 12 a huam ang. Homestay siam tura thlan chhuahte hi beneficiary tih an ni. Sum hi October atangin release tan tur a ni. Sum hi bank account ah transfer tur a ni. Central guideline angin installment thumin kan release ang (50:40:10). Sum dawn kim atanga thla 3 chhungin homestay hi operate hman tur a ni.

Homestay dang 10 sakna tur sum (₹49.96lakhs) hi IRFC (Indian Railway Finance Corporation Ltd) te CSR( Corporate Social Responbility) atangin dawn a ni a. Thenzawl leh Serchhipah te sak an ni ang. Hemi hnuaia homestay bik hi MTDA in a enkawl ang. Fund hi installment thumin (40:50:10) in an release ang.

Vawiin programme hi Ramdinsangi, Tourisim Officer in kaihhruaiin, Pi Irene Zohlimpuii Chongthu, Addl. Secretary Tourism Department in kalkhawmte lo lawmna thu a sawi a. Pi Lalthakimi Pachuau, Joint Director, Tourism Department in ‘vote of thanks’ sawiin, programme thenkhatna( 1st Session) chu a ti tawp ta a ni.

Tlailamah hian Programme thenhnihna( Technical session) hman a ni a. Hetah hian Progress partners leh beneficiaries te chu Homestay enkawl dan tur leh a kaihhnawih thil pawimawh hrang hrang te chipchiar taka zirtir an ni a. Zawhna leh Chhanna hunte hman a nih bakah Baseline Data lakhawm, Agreement ziah, Form fill up leh document pawimawh te thehluh nan hunah hman a ni.