Hnahthial Post | 11th May, 2025: Boxing huanga Hnahthial hminga Gold 10 chuang lai lo la tawh, Tv H Lalrinhlua, Pu H Lalfakzuala Electric Veng, Hnahthial fapa chuan boxing khawvel chawlhsan dawn.
Hnahthial khaw tlangval, Boxing huanga Hnahthial hminga vawi tam lo khel tawh leh Mizoram aiawh pawha vawi eng emaw zat lo khelh tawh thin, Tv H. Lalrinhlua chuan NBE TATA Motors, Clash of the Stars 2025, May ni 30-a LPS ARENA, Falkland, Aizawl-a khelh tur chu a Boxing zin kawng khar nan hman a tum a, he hunah hian Hnahthial leh a chhehvel mipuite bakah amah lo tan thintu zawng zawng te he hunah hian a tawp nana tawiawm leh turin a sawm a ni.
Tv H Lalrinhlua (HluBawiha) hian kum 2012, kum laihawl atangin Hnahthial Boxing Association (now Hnahthial District Boxing Association HDBA) hnuaia 'Catch Them Young' atangin Boxing hi a tui chho a. Mahni In lamah theih tawpin a inzir chho a, Boxing khelhna tura hmanruate in lei chawpin leh chhungte tanpuina zarah a ti tauh tauh thin. Kum 2014 khan Lungleiah pawl 11 zir pahin Mizoram Sports & Youth Services Coach Pu Lalfakzuala bulah training-ina awm zawk a. 2018 aṭangin Aizawlah mumal zawkin training a nei chho ṭan a ni.
Kum 2012 August thla khan Mizoram Open Boxing Championship, Vairengteah Junior-ah khelin Gold a la a, hei hi Boxing khawvela a inlanna hmasa leh hnehna a channa hmasa ber a ni nghe nghe a ni.
Boxing khawvelah hian State Level-ah vawi 13 emaw a aia tam a inhnek tawh a, Pro-Fight hi ṭum 5 lai khelin, a hun lai hawlah taksa lamah harsatna a nei chho a, vanduaina a neih avangin a che sual ta zeuh zeuh a ni. Mizoram pawnah hian Mizoram aiawhin vawi 7 inkhelin a zin chhuak tawh bawk a ni. Mizoram tan ṭum 2 Medal a lo la tawh a ni.
Mizoram chhungah hian Hnahthial hminga a khelhnaah Gold 10 emaw a aia tam a la tawh a (a zat chiah hi hriat chian a ni lo), Best Boxer Trophy te pawh a lo dawng tawh hial a ni. Pro-Fight ṭum 5 a khelhah Final vawi 4 lai a inhnek thleng tawh bawk.
Professional Fight hi 2021 khan LPS buatsaih 'Fight Night 2' kha khel tawhin, Professional Fight a khelh hmasak ber leh a tawpna a ni ta rih a ni.
2019 khan LPS Pro-Fight a khelh hma ni 3 la awmah mit lamah harsatna a neih avangin Doctor a rawn a, hemi tum hian Doctor-in Boxing khel tawh lo turin leh a mit lam harsatna a nasat tur thu te a hrilh a. Chutih rualin, Durtlang Hospital-a a Doctor rawn pakhat chuan, "I Carrier ti chhe lovin kan siam dawn nia," a tih chuan beiseina thar a neih phah nasa hle a. Hemi hnu hian Gold vawi 3 lai a hnek chhuak leh bawk a ni. "Training-a han inhnek reng chuan khaw hmuh fiah lo hi a lo chhuah leh ṭhin avangin, rilru fim tak puin, chhungkaw dinhmun thlir chungin Boxing coaching lam hi ka luh chilh ta a ni," tiin nikum (2024) aṭang kham Aizawl Edentharah Boxing Gym, a enkawl chho ṭan a ni.
Boxing a khelh ṭan aṭanga a chawlhsan dawn hnu thleng hian Pathian hnenah leh a nu leh pa, a chhungte bakah Hnahthial mipuite hnenah lawmthu a sawi a. A inkhelhnaa lo ṭawiawm ṭhintu te zawng zawng chungah lâwmthu a sawi tak meuh meuh a ni.
Ni 30 May, 2025 zana NBE TATA Motors, Clash of the Stars 2025, LPS ARENA, Falkland, Aizawl-a a khelh tur chu Hnahthial mipuite tan a hlan dawn a; Hnahthial mipuite a tawp nana ṭawngṭawi pui tur leh amah ṭawiawm turin a sawm tak meuh meuh bawk a ni.
"Boxing-ah a ni emaw, engah pawh mi thawkrim leh chhel hi ka ngaihsan chi an ni a. Harsatna leh retheihnaina a hneh theih loh ho hi ka ngaisang. Khawvel Boxer-ah chuan Muhammad Ali ka ngaisang ber" - Hlubawiha
