Hnahthial Post | 31st May, 2025: Tunhnai ruah leh thlipuiin Mizoram hmun hrang hranga kawlphetha pekna a tichhe nasa hle a, Sub-Station lian a power pekchhuahna khawl leh power pekchhuahna hrui liante a chhe nual a, siamthat hna thawh mek zel a ni a. Power & Electricity Department chuan District hrang hrang dinhmun tlangpui chu hetiang hian a tarlang a ni:
Aizawl District:
Mizoram New Capital Complex area chu High Court building atanga chhak lam zawng pek theih a la ni lo a, buaipui mek a ni. Assembly House power pek theih a ni lova, buaipui mek a ni.
Tlangnuam Feeder in a chawmte hi Melthum piah lam pek theih a la ni lo a, a chhiatna lai zawn mek a ni. Tlangnuam view atanga Tlangnuam field bul DT S/S 11kV line a chat a, vawiinah siam that tura hmalak mek a ni.
Chawlhhmun area-ah, lungrem chimin line a vuak chhiat avangin power pek theih a ni rih lo a, buaipui mek a ni. Printing DT 250 kVA transformer hian phase khat a pe chhuak kim thei lo a, tranformer hi hawn a ngai dawn a, ruah sur chung chuan hawn theih a ni rih dawn lo a, phase hi kim lo in power hi pekchhuah rih a ni.
Sailam, Lungleng, Sumsuih Darlung khua a powerline chhiate siamthat niin, power pek tawh a ni. Thiak, Reiek leh Samlukhai te power pe thei tura buaipui mek a ni.
Ni 26.5.2025 tlai 5:20 ah 25MVA, 132/33kV Power Transformer Sihhmui Sub-Station a chhia a. 33 kV Luangmual to Sihhmui pawh a fault bawk. 132 kV line Luangmual-Sihhmuia line fault pawh siamthat niin, power pek lehnghal a ni. Sihhmui Sub station chhunga khawl chhiate pawh siamtha tura hmalak mek zel a ni.
Ni 30.5.2025 9:10pm ah Luangmual Sub-Station-ah 33 kV feeder peknaah CT a chhiat avangin Aizawl West I, Sihhmui Sub-Station, Lengpui Sub-Station, Sairang Sub-Station leh Tlangnuam Sub-Station chawm veng thenkhat power pek theih a ni rih lova, buaipui mek a ni.
Tukin Ni 30.5.2025 zingkara 33kV Maumual line, Solomon’s Temple bula thing tluin a vuakchhiat chu siamthat tawh a ni. Aibawk 33 kV line pawh siamthat tawh a ni. Ni 31.5.2025 zing dar1:05 AM ah 132kV Bukpui line a chhia a, endik mek a ni.
Durtlang S 11kV feeder hrui chat vangin power pek theih a ni lo a, Durtlang N 11kV feeder hi Sihphir thleng pek a ni a, a bak Nausel leh Neihbawih lam pek tura hmalak mek a ni. New Jail feeder tha lo pawh buaipui mek a ni bawk.
Darlawn 33 kV Sub Station atanga pek Kepran, Serzawl, Darlawn, Vaitin, Khawpuar khua ten eng an la nei thei lo.
Kolasib District:
Lungdai leh a chhehvel khuate power pekna 33kV chhia siam mek a ni a, 11kV Hortoki line chhia pawh siam mek niin, 11kV Bualpui line chu Kawnpui Hmarveng thleng power pek tawh a ni a, a bak zawng pe turin hmalak mek a ni. Sentlang line pawh Zanlawn thleng bak pek theih a ni lo a, hmabak lam hi thli natna lam a nih vangin hmalak chhunzawm mek zel a ni.
Vairengte Power Sub Division hnuaiah N.Chhimluang feeder chu ni 31 May, 2025 zingkar khan thing tlu in a delh vangin power pek theih a ni lova, hma lak mek zel a ni.
Mamit District:
Mamit ah hian 132 kV leh 33kV hmangin Power dawn theih a ni a, amaherawhchu khaw chhung leh a chhehvel khuate power pekchhawnna kawngah harsatna a la awm a, siamtha turin hmalak mek a ni.
Zamuang Sub-Station aṭanga eng pek chhuahte zingah Kawrthah, Chuhvel, Rengdil leh Hriphaw khuaten eng an la hmu theilo a, pe thei turin siamthat hna thawh mek a ni.
Zawlnuam Sub-Station atanga eng pekchhuahte hi Kanhmun piahlam khuate eng la pek theih a ni rih lo.
W Phaileng 33kV line Dampui ngaw karah a chhiat vangin West Phaiuleng, Marpara, Rawpuichhip area ah power supply la pek theih a ni lo. West Phaileng eng pekna hi titha turin ngawrh taka hnathawh mek a ni.
CHAMPHAI DISTRICT LEH KHAWZAWL DISTRICT:
Nimin ni 30.5.25 khan 132kV Zuangtui- Saitual- Vankal- Khawzawl line chu zan dar 7:44 PM khan Vankal leh Khawzawl inkara line chhia a awm avangin khawchhak tlangdungin Power supply an nei lo a, Zan Dar 9:05 pm ah Lunglei-Bukpui - E.Lungdar - Khawzawl kaltlangin Khawzawlin Power supply a dawng leh a, Champhai pawh Dar 10:53 pm ah pek chhoh a ni.
Power supply tluang taka pekchhuah a nih laiin Dar 11:42 pm ah Lunglei Kawmzawl aṭanga Power pekna hi Kawmzawl sub-station Bus bar kan vangin a chhe leh a, hei vang hian ni 31.5.25 chawhma dar11 vel ah Lunglei -Bukpui- E.Lungdar-Khawzawl kaltlangin Champhai District leh Khawzawl District ten Power supply an dawng leh thei ta a ni.
132 kV line Vankal leh Khawzawl inkar thingtlu in line a vuak chhiat avanga power khaihlak chu thenfai leh siamthat hna thawh mek a ni. Tin, Vankal Solar Park-a Power Transformer 12.5 MVA ah problem a awm avangin Vankal Solar Plant atangin kawlphetha siamchhuah theih a ni rih lo.
Lunglei District:
Kawmzawl Sub Station a Power Transformer 2.5MVA a chhiat vangin Pukpui (Lunglei) area in power supply an la hmu thei rih lo. Tin, Lunglei BSF Camp bula lei tawlh in Lunglei Zotlang power pekna 11kV line ban a tih chhiat tel avangin Zotlang feeder in a chawm ten power supply an hmu thei rih lo.
Heng bakah hian District chhunga hmun hrang hrangah 11kV line chhia leh LT ban repair ngai a awm nual bawk.
Thing tlu in Tlabung - Borapansury 33kV line a vaw chhia a, Borapansury area lamin power an hmu thei rih lo a, Lungsen - Chawngte 33kV line thingzar thliakin a vaw chhia a, Chawngte leh Bungtlang 'S' lamin power an hmu thei rih lo bawk. Hriattheih chinah Lungsen area ah thingtlu in 11kV line a vuak chhiat hmun 5 ah a awm a ni. Heng bakah hian LT line chhia hmun engemaw zat buaipui ngai a awm bawk.
Thenhlum atanga power pekchhuah khua Bunghmun Lungchem, Sachan, Laisawral leh Sesawm khua ten power supply an la dawng thei rihlo. Buarpui 33 kV Sub-Station atanga pek Kawlhawk leh Bungtlang West ten power an la hmu thei lo.
Lawngtlai District:
Chawnhu Sub-Station a Power Transformer 6.3MVA ah chiang lo a awm a, hei vang hian he Sub-Station in a chawm khuaten power supply an hmu thei rih lo.
Lawngtlai khawchhunga leiminin 63kVA Distribution Transformer a hnawl tel a. Lawngtlai AOC venga Distribution Transformer pakhat pawh leimin vangin hmun him zawkah sawnchhuah a ngai dawn a ni.
Heng bakah hian 11kV line leh LT line chhia buaipui ngai hmun tam takah a awm bawk.
Siaha District:
Meisatla - Tuipang 33kV line a chhia a, line fault-na lai hi zawn mek a ni. Tuipang 'V' - Phura 33kV line thingtlu in a vaw chhia a, siamthat mek a ni bawk. Heng bakah hian 11kV line leh LT line siam that ngai a awm nual bawk.
Serchhip District:
Serchhip 132KV Sub-Station, Zuangtui to Bukpui line chhia chu siamthat hnuah harsatna a awm leh avangin la buaipui mek a ni. Bukpui- Kawmzawl 132 kV line chu Mualthuam daiah thingin a delh a, thingtlu hi thenfai tawh niin power pekna pawh siamthat tawh a ni. Serchhip khawchhung power pekna siam mek a ni bawk.
Saitual District:
Saitual khawchhung tuilakna power pekna 11KV line a tha lo a , siam mek a ni, Mualpheng feeder pek theih loh a ni a, buaipui mek a ni bawk.
Hnahthial District:
Hnahthial District power pekna 33kV Bukpui-Hnahthial line leh Theiriat-Hnahthial line te a chhiat avangin Hnahthial District pum in power an la nei thei lova, line chhia siam mek a ni.
Heng bakah hian Mizoram hmun hrang hrangah khaw chhung leh veng chhung power inpekna chhe neuh neuh tam tak a awm a, Power & Electricity Department a thawktuten ngawrh takin khawchhe hnuaiah chhun zan zawmin kawlphetha inpekna chhiate siamthat hna an thawk mek reng a ni.
Tags
News