Lok Sabha MP Pu Richard Vanlalhmangaiha'n MUP Sub-Hqrs Hnahthial Office hawng

Hnahthial Post | May 15, 2026, Aizawl: Vawiin khan Hnahthial Bazar Vengah Mizo Upa Pawl: Sub-Headquarters, Hnahthial Office chu Lok Sabha MP, Pu Richard Vanlalhmangaiha chuan hawngin South Tuipui bialtu MLA Pu Jeje Lalpekhlua'n a tawiawm.

MP, Pu Richard Vanlalhmangaiha chuan Hnahthialin Upa ngaihsak thiam MLA tha tak an nei chu a lawmpui thu a sawi a. Upate'n inkawmhlim paha an ngaih pawimawh zualte sawihona hmun tur an nei ve ta chu a lawmpui takzet thu sawiin Sawrkar Laipui pawhin Upate chu a ngaih pawimawh thu a sawi a. Upate chu kan VIP an nih thu leh Upa ngaisang hnam apiang chu hnam dingchhuak an nih zel thu a sawi bawk. Kum tam tak chhung an lo fawmkhawm tawh an thiamna leh finna te chu thamral tir mai lovin ram leh khawtlang hruaitute chu an rorelna kawngah lo finchhuah zel turin a sawm a ni.

MP hian Office hawn thar lawmpui nan MUP hnenah ₹3000 a hlan nghal a ni.

MLA, Pu Jeje Lalpekhlua chuan MUP chu a ngaihpawimawh thu sawiin, mi in luah ngai lova anmahni puala building a la hmuhsak thei lo chu pawi a tih thu sawi a. Mahni hriselnate ngai pawimawh tura chahin, Hnahthialah ringawt pawh Healthcare Scheme hnuaiah hian damlo enkawl nan a thlawnin cheng 91 chuang man an hman tawh thu tarlangin la in register ve lo te pawh lo ngaihven ve thuai turin a chah nghal a ni.

MUP Office hawn thar hi Bazar Veng, Pu C. Lalfakzuala building chung zawk niin luah man hi MLA Fund atanga pek a ni dawn a. Hei bakah hian upate intihhlimna tur - TV, Carrom Board leh thil dang dangte MLA hian hlan nghalin WiFi, Tui leh Gas connection-te pawh tih fel nghal vek a ni bawk.

Advertisement 

Hawnna programme hi Pu F. Aithuama, MUP Sub Headquarters Hnahthial President chuan kaihruaiin Pu Kawlhmingliana, MUP Sub Headquarters Hnahthial Vice President chuan lawmthu sawiin hun a khar a ni.