Cooperation Minister-in Apex Bank Zemabawk Branch a hawng

Hnahthial Post | July 20, 2026, Aizawl: Vawiin khan Pu P.C. Vanlalruata, Cooperation Department changtu Minister chuan Salvation Army Hall, Zemabawk Venglaiah, Mizoram Co-operative Apex Bank Ltd. Branch 37-na Zemabawk Branch chu khuallian niin a hawng. ni.

Hawnna puala hun hmanah hian khuallian Cooperation Minister Pu P.C. Vanlalruata chuan thusawiin, Aizawl Municipal Area chhunga veng lian ber pawl leh a veng chhung laili bera Mizoram Cooperative Apex Bank Ltd. Branch thar hawn a ni thei chu lawmawm a tih thu a sawi a. Apex Bank chu sawrkar nen pawha thawhhona tha tak nei an ni tih tarlangin, sawrkar hmalaknate tihhlawhtlin kawngah pawh thawhhlawk tak an ni tih a sawi a. Sawrkar policy hrang hrangah thlai thlan bik te awmin Zau Policy pawh tihngelngheh tum mek a nih thu sawiin, chu policy chu society ten a tangkai thei ang bera hman tum turin a fuih a. Mizo Bank anih ang ngeia mipuite leh sawrkar nen pawh thawhhona tha tak nei chhunzawm zel turin kalkhawmte chu a sawm nghal bawk a ni.

He hunah hian Apex Bank Chairman, Pu Lalnunsanga pawhin thusawiin, Mizo mipuite tan zau zawkin Apex Bank chu a inzarpharh zel a, Aizawl veng hlun leh Bank mamawhtu mipui tamna Zemabawk Veng laili taka Bank an hawng thei chu lawmawm a tih thu a sawi a. Apex Bank chu Bank zingah, a neitu za a za Mizo awm chhun a nih thu sawiin Apex Bank chuan hlawkna (Profit) chauh a um lova, rualkhai zawka hmasawnna a thlen theih nan thingtlang lamah pawh a inzarpharh zel a ni tih sawiin July ni 14, 2026, kar hmasa mai pawhin Saipum khua, Kolasib District-ah Branch thar an lo hawn tawh thu a sawi bawk.

Pu Zosangliana, Chairman, Zemabawk Local Council pawhin, hun rei tak atang an lo beisei Apex Bank Branch thar hawn a ni ta chu lawmawm a tih thu sawiin Zemabawk leh a chhehvel tana hmasawnna ngelnghet thlentu a nih ngei a beisei thu a sawi bawk.

Vawiina Hawnna inkhawm hi Pu Lalnunsanga, Apex Bank Chairman chuan a kaihruai a. Pu Vanlalhriata, Deputy General Manager-in Branch din a nih theihna tura a tir atanga hmalakna hrang hrang leh technical report-te pein, Apex Bank chuan Branch 37 leh ATM 45 an enkawl mek thute a tarlang a. Pu Lalrinchhana, Vice Chairman, Apex Bank chuan lawmthu sawiin hun hi a khar a ni.