Hnahthialah Agriculture & Farmers Welfare Department Director hovin National Mission on Edible Oil chungchang inzirtirna hun hman a ni

Hnahthial Post | July 19, 2026, Hnahthial: National Mission on Edible Oil (Oilseeds) chungchang leh Crop Insurance chungchanga kuthnathawktute hriattur inzirtirna leh inhrilhhriatna hun chu Inrinni (18th July) khan District Agriculture Office Conference Hall-ah neih niin Pi Vanramthangi, Director, Agriculture & Farmers Welfare Department chuan khuallian niin a hmanpui.

He hun hi Pi Julie Zodinpuii, DAO, Hnahthial chuan kaihruaiin Pi R. Lalramhluni Jt. Director (Crops) hnen atangin thlai hriak nei (Oilseeds) te hlawk zawka hralh leh thar chhuah dante sawi ho a ni a. Pu Vabeilaiku Chozah, Dy. Director (PMFBY) hnen atangin thlai chinte'n khuarel chhiatna leh harsatna an tawh palh pawh a sum an hmuh let leh theih dan tur -'Crop Insurance' chungchang zirtirna ngaihthlak a ni.

He hunah hian Agriculture Department hnuaia Officer-te leh Hnahthial District chhung khaw hrang hrang atangin kuthnathawktu thahnem tak an kalkhawm a ni.