MLA Pu Jeje Lalpekhlua'n School of Agricultural Sciences 4th Batch Pass chhuakte lawmna hun hmanpui

Hnahthial Post | July 18, 2026, Hnahthial: Kar kal ta Zirtawp Ni (17th July) khan School of Agricultural Sciences (SAS), Hnahthial Auditorium-ah SAS 4th Batch-te tan passing out programme buatsaih niin South Tuipui bialtu MLA, Pu Jeje Lalpekhlua chu khuallian niin, a hmanpui a. Pi Vanramthangi, Director, Agriculture & Farmers' Welfare Department chu khual zahawm niin Pu VL Hmangaihchhunga, Principal, SAS chuan hun hi a kaihruai a ni.

Khuallian, Pu Jeje Lalpekhlua chuan thu sawiin Hnahthial tana hmun pawimawh tak mai pakhat, SAS atanga pass chhuak zirlaite chu a lawmpui thu a sawi a. Theihtawpin SAS tichangtlung tura hma an lak thu sawiin zirlaite chu he hmun atanga zir chhuak thei an ni chu inchhuang tura a duh thu a sawi a. Chutih rualin rahbi hmasa ber an chuangkai chiah a ni tih hre tura a duh thu sawiin harsatna an la hmachhawn tur thu a sawi. Hlawhtlinna an chang mai lo a nih pawhin beidawng mai lovin taima taka bei hram hram tura chahin hlawhtlin hma loh chu mahni seh tawh chu seh tlat turin a chah a ni. Hmasawnna kawng zawh zel tura fuihin mahni thiam chinah duhtawk lo tur leh thiamna chhar belh zel turin midang thiam zawkte rawn hreh lo turin a chah bawk.

MLA chuan tunlai thalai tam takte chu eng hna pawh thawh hreh an nei lo chu fakawm a tih thu sawiin zirlai pass chhuakte chu eng kawng pawh zawh se, tih tak takna nen bei zel tura chahin kut hnathawh lama kal, theihtawp chhuahte chu sawrkar pawhin theihtawpa puih a hreh loh thu a sawi a ni.

Khual zahawm, Pi Vanramthangi chuan SAS chu Agriculture Department tana institution pawimawh tak a nih thu sawiin pass chhuakte chu a lawmpui thu a sawi a. Zirlaite chu Sawrkar hna ringawta innghat lo tur leh mahni ke a ding thei tura inbuatsaih turin a chah a ni.

4th Batch of SAS-te hian kum 2024-26 chhung khan zirin zirlai sawmhnih pakua (29) an pass chhuak a. 1st Division-a pass pali (4), 2nd Division-a pass sawm pali (14) leh 3rd Division-a pass sawmpakhat (11) awmin H. Remlalpuii, Theiriat chuan 89.15% hmuin SAS 4th Batch-ah pakhatna a ni.

He program-ah hian A&FW Department leh Hnahthial District Officials sawm bikte bakah VC, MJA leh pensioners te an tel a; Pi Mary Lallawmkimi, Vice Principal, SAS chuan lawmthu sawiin hun a khar a ni.

School of Agricultural Sciences (SAS) hi Integrated Training Centre (ITC) ni thinin kum 1981 khan din a ni a, kum 2020 khan Diploma Course-a hlankai a nih hnuin SAS tih a hming thlak a ni ta a ni. Mizoram Agriculture & Farmers' Welfare Department hnuaia Training Centre awm chhun niin kum tin seat 30 a awl thin a. Semester li (4) awmin tun thla July ni 27 hian 6th Batch tan class tan a ni ang.