Mizoram Larsap-in Mizoram Rural Bank Annual Report 43-na a tlangzarh

Hnahthial Post | July 20, 2026, Aizawl: Mizoram Larsap General (Dr) Vikay Kumar Singh, PVSM, AVSM, YSM (Retd) chuan vawiin khan Financial year 2025-2026 chhunga Mizoram Rural Bank (MRB) hmalakna hrang hrang tarlanna 43rd Annual Report chu Lok Bhavan-ah a tlangzarh.

Larsap General (Dr) Vijay Kumar Singh chuan Mizoram Rural Bank (MRB) in kum dang zawng aia hmaa Annual Report an peihfel leh hmasawnna hrang hrang hmuh theiha a awm chu lawmawm a tih thu sawiin, an thlen chinah duh tawk mai lova, tun aia hmasawn lehzual tura thawk chhunzawm zel turin a fuih a. Mizoram thingtlang kil tin dapchhuaka awm MRB chu thingtlang sum leh pai dinhmun innghahna pawimawh tak an an nih thu sawiin, mipui tana duan central scheme hrang hrangte, education loan leh social security scheme tam zawk pek chhuah leh tihhlawhtlin kawngah theihtawp chhuah turin a chah a ni.

General (Dr) Vijay Kumar Singh chuan Mizoram chu chhiah luh tlemna revenue deficit state a nih avangin chhiah lakluh kawngah tanlak a tul thu leh thingtlang sum leh pai dinhmun (rural economy) tihhmasawn chu hemi atana pawimawh tak a nih thu a sawi a. Loneitute thar chhuah hlawk zawka hralha sum lakluh tipung turin market linkage tha ruahman a tul thu sawiin, heng bakah hian inzirtirna neih tam a tul thu a sawi a. MRB hotute chu Credit Deposit Ratio tha leh NPA awm lo siam tura tan la chhunzawm zel tura chahin, NABARD leh MRB-te chu hmasawnna ruhrel tha zawk siam tura theihtawp chhuah turin a fuih a. Tun aia tha zawk ni tura inenfiah thin tur leh an hnathawhte puangzar tam tura chahin, hlawhtlinna tam zawk hmu turin duhsakna a hlan a ni.

Pu Bhaskar Manta, General Manager, NABARD, Aizawl pawhin thu sawiin, loneitu rethei tak takte, hmeichhia leh Self Help Group-te tanpui turin MRB nen thawhhona tha tak an neih thu a sawi a. MRB hmalakna leh hlawhtlinnate fakawm a tih thu sawiin, NABARD chu MRB leh Mizoram mipuite tana thawk turin a inhuam reng a ni, a ti bawk.

He hun hi Pu C. Laldampuia, Director, Mizoram Rural Bank RSETI chuan kaihruaiin Pu Saibal Kanti Roy, General Manager, Network -I chuan inlawmna thu a sawi a. Pi Sheryl L Vanchhong, Chairman, MRB hnen atangin Annual Report leh hlawhtlinna mellung pawimawh tlangpui ngaihthlak a ni a. Pu Lallawmzuala Colney, General Manager, Network -II in lawmthu sawiin hun hman a khar a ni.

MRB Annual Report-in a tarlan dan chuan Financial Year 2025-2026 chhungin Mizoram Rural Bank chuan sum chevel, deposit leh loan pek chhuah cheng vaibelchhe 10,656.08 nei tlingin nikum aiin za zela 11.26 in a tam a, hmarchhak state Rural Bank zingah a tam ber. Hlep (Net Profit) cheng vaibelchhe 152.27 hmuin, hmarchhak state Rural Bank zingah pahnihna a ni a. Bank Branch tin sum khawih zat Business per Branch (BpB) cheng vaibelchhe 100 aia tam nei thei India ram Rural Bank pali zingah telin, BpB cheng vaibelchhe 100.53 a nei tling a. Thawktu pakhat zel sum khawih zat Business per Employee cheng vaibelchhe 21.70 nei tling phain, India ram Rural Bank zingah pahnihna niin, hmarchhak state-ah pakhatna a ni a. Sum chevel zinga za zela 97.36 chu digital financial transaction ni phain, hmarchhak state-a titha ber leh India ram pumah pahnihna a ni a. Credit-Deposit (CD) Ratio za zela 63.29 neiin, hmarchhak state Rural Bank zingah pahnihna a ni a. Pradhan Mantri MUDRA Yojana (PMMY) hnuaiah DFS target za zela 154 thleng phain hmarchhak state Rural Bank zingah a sang ber a ni.

Mizoram bank zingah loan pe chhuak hnem ber niin cheng vaibelchhe 4,129.98 a tling a, sum dahluh dawng tam ber dawttu niin cheng vaibelchhe 6,526.10 a tling pha a. Sawrkar scheme pawimawh tak takah hmahruaitu niin Mizoram chhunga Pradhan Mantri Jan Dhan Yojana (PMJDY) hnuaia account za zela 78, Pradhan Mantri Jeevan Jyoti Bima Yojana (PMJJBY) hnuaia inziaklut za zela 56, Pradhan Mantri Suraksha Bima Yojana (PMSBY) hnuaia inziaklut za zela 53 leh Atal Pension Yojana (APY) hnuaia inziaklut za zela 43 te chu MRB hnuaia mite an ni.

Heng bakah hian khawtlanga dawmkan ngai zual tan loan pe chhuakin Self-Help Groups (SHGs) zinga za zela 95, National Rural Livelihoods Mission (NRLM) hnuaia za zela 90, National Urban Livelihoods Mission (NULM) hnuaia za zela 79, Kisan Credit Card (KCC) scheme hnuaia za zela 67, MUDRA hnuaia za zela 29 leh Prime Minister's Employment Generation Programme (PMEGP) hnuaia za zela 27 te hi MRB kaltlanga loan pekte an ni.

Mizoram Rural Bank hi Scheduled Bank niin Mizorama bank inzarpharh zau ber a ni a. District tinah inzar pharhin branch 106 leh thawktu 491 a nei a. Bank Branch awm lohna hmunah Business Correspondent (BC) dah zelin BC 350 chuang a awm mek a. Kolasib-ah Mizoram Rural Bank RSETI a awm bawk.