Tourism Minister Pu Lalnghinglova Hmar in Guwahati-ah Imaginarium 2.0 hmanpui

Hnahthial Post | July 19, 2026, Guwahati: Nimin chawhnu dar 2:30 khan Pu Lalnghinglova Hmar, Minister of State (i/c), Tourism Department chuan North East-a event, tourism, hospitality leh entertainment industry a mi pawimawhte intawhkhawmna lian, “Imaginarium 2.0 - North East Events & Entertainment Leaders’ Summit” chu Mayfair Spring Valley Resort , Guwahati ah a hmanpui.

Imaginarium 2.0 hawnnah Tourism Minister Pu Lalnghinglova Hmar chuan thu sawiin, “Mizoramin tourism-ah theihna sang tak a neih thu kan sawi thin a, tunah chuan a taka chantir a hun tawh. Mizoram tlang leh ruam mawi, lui leh boruak thiang takah in event neihte rawn nghat ula, lawm takin kan lo thleng ang che u.” tiin event management lama mi lian kalkhawmte chu a sawm.

Minister chuan Mizoram chu hmun kilkhawr a ni tawh lo tih sawi chhunzawmin, “Mizoramah rel a luh tawh avangin awlsam leh tlawm zawkin a zin zung zung theih tawh a, thlawhna phei chuan India ram hmun hrang hrang atangin darkar rei lo te ah a thlen theih.” tiin, event tourism chu a thlengtu tan a hlawk a, eizawnna tam tak siam theitu a nih avangin Mizoram pawhin nasa lehzualin tan a la dawn tih a sawi.

He hunah hian Mizoram in tourism event leh festival lian thleng tura theihna a neih that zia, sorkarin event tourism hmasawn nana hma a lak dan leh Mizoram Tourism Calendar te video presentation hmanga enho a ni a. Video hi Mizoram Tourism Department leh I&PR Department te tangkawpin an siam niin, Mizoram tlawh chhan tur hrang hrangte mawi taka tarlan a ni bawk.

Imaginarium 2.0 hi vawiin July 19, 2026 thleng neih tur niin, India rama event leh entertainment industry a mi pawimawh tak tak ten India hmarchhak state te event tourism-a hma an sawn theih dan tur an ngaihtuahho dawn a ni.

He hunah hian Minister hi Dr. R. Lalrinchhani, Deputy Director, Tourism Department leh Pi LV Lalawmpuii, Assistant Tourist Officer ten Mizoram atangin an tawiawm a ni.