29-South Tuipui Assembly Constituency tan SIR 2026 Final Electoral Roll tlangzarh niin vote nei 15522 an awm

Hnahthial Post | Sep 8, 2026, Hnahthial: Nimin (7th Sept) dar 11:30 am khan Hnahthial DC Meeting Hall-ah 29-South Tuipui Assembly Constituency tan Special Intensive Revision (SIR), 2026 hnuaia Final Electoral Roll chu Electoral Registration Officer, Pu Zothanmawia Khiangte chuan a tlangzarh a. Pu S.Kaptluanga, Election Officer chuan he hun hi kaihruaiin Village Council, Hnahthial Town chhunga BLO, MJA, Political Party leh NGO hrang hrang hruaitute an tel a ni.

ERO, Pu Zothanmmawia Khiangte chuan felfai taka SIR 2026 hmawr an bawk thei chu lawmawm a tih thu sawiin SIR kalpui a nih dan tlangpui a tarlang a. Hearing atangin mipuite’n India khua leh tui an ni tih finfiahna tur document pawimawh an nei tha tawk lo tih a lan thu sawiin hearing an koh chhan tam ber chu SIR 2005-a mahni emaw, mahni pa hming emaw ziak dan inang lo leh birth certificate-a pafa leh unau kum inhnaih lutuk te a nih tlangpui thu a sawi a. Foreign-a piang ni si, sawrkar pekchhuah ngei mai Birth Certificate kawl an awm thin chu veiawm a tih thu sawiin DC Office chu a pe chhuaktu ni mah se VC-te recommend-na tel lo chuan an pek chhuah ngai loh thu a sawi a. Chuvangin VC, kohhran leh khawtlang hruaitute chu ram leh hnam humhim nan tanrual puiah a sawm nghal a ni.

Election Officer, Pu S.Kaptluanga chuan SIR chu hun leh tha heh tak mai a nih thu sawiin indaih lo tak chung pawha felfai taka an zo thei chu BLO leh election branch-a thawktute thawhrimna zar a nih thu a sawi a, khawtlang hruaitute tawiawmna avangin an chungah lawmthu a sawi bawk a ni.

SIR,2026 kalpui a nih hma hian 29-South Tuipui A/C ah elector 16478 awmin Polling station 27 a awm a. Enumeration phase zawh fel hnuin chung 16478 zingah chuan mitthi 574, hmung danga insawn mi 358, e-roll a awm nawn 32 leh chin hriat loh mi 71, an vaiin mi 1035 te chu paih an ni a. Draft Electoral Roll-ah khan Enumeration Form sem chhuah atanga Digitized theih electors 15443 awmin 2005-a anmahni emaw, an thlahtute emaw chuang lo mi 1183 leh mapping-a fel lo awm mi 1795-te tan ERO leh AERO ten hearing July ni 22-29 inkar khan an nei a ni.

Final electoral roll-ah hian Form 6 atanga inthun thar mi 515 awmin South Tuipui A/C a rawn insawn lut (Shifted) hi mi 68 an awm a, thun thar zawng zawng hi mi 583 an awm a ni. Hearing neih hnu a paih hi mi 418 awmin insawn avanga paih mi 86 an awm a, an vaiin draft roll atangin mi 504 paih niin final roll-ah hian mi 79 (0.51%) -in an pun belh a ni.

Final e-roll-ah hian mipa 7624 awmin hmeichhia 7898 an awm a, 29-South Tuipui A/C chhungah hian vote nei zawng zawng hi mi 15522 an awm mek tihna a ni. Polling station zingah hian Cherhlun-I chu tam berin elector 956 an awm a, New Kawnpui chu tlem berin elector 62 an awm a ni.

Hnahthial-II (Bazar leh Kanaan) bakah Hnahthial-III (Model Veng leh Venglai) Polling Station siam rem (rationalized) niin Kaanan leh Venglai tan Polling Station thar Hnahthial-VII siam a ni a, Polling station hi 28 a awm tawh dawn tihna a ni.